世界波：性愛奇效醒神減痛

現代人愈來愈注重健康，除咗注意飲食之外，更會定期做運動，其實好多人都忽略咗，定期嘅性生活，其實都係健康活力嘅泉源；相反，長期缺乏性愛，生理同心理都會慢慢走下坡，體內賀爾蒙更隨時會出現不平衡嘅狀況添！

無論男女，都應該知道性愛嘅神奇功效，佢除咗係表達愛意、令人身心愉快及宣洩情緒嘅好方法之外，原來仲有好多醫藥療效，隨時會令人愈做愈醒神。

奇效一 消除失眠

好多人以為酣睡係必然嘅，但其實有好多忙碌嘅都市人，都飽受失眠之苦，更因此令身體變得愈來愈差。其實失眠嘅成因有好多，人人都不盡相同，但據美國嘅性學專家指出，美滿愉快嘅性愛，可以令原本繃緊嘅精神同身體放鬆，肌肉亦可以喺性愛中得以舒展，睡意自然產生，可有助消除失眠症狀。

奇效二 減輕經前綜合症

女性在月經前嘅5至7天，因為流入骨盤嘅血液增加，有可能引起擴張同收縮，導致腰背痛或腹腔脹痛。而性行為時嘅肌肉收縮活動，能促使血液加速流出骨盤區，增加血液循環，從而減輕盆骨嘅壓力，間接令腹部及腰部嘅不適感減低。

奇效三 精液可抗菌

美國嘅大學實驗證明，精液中有一種抗菌物質─精液胞漿素，能夠殺死葡萄球菌、鏈球菌、肺炎球菌等致病菌。所以適量嘅性愛，可以令女性生殖器免受微生物嘅侵害。長期冇性生活嘅女性，更容易患上陰道炎、子宮內膜炎及輸卵管炎等病症。

奇效四 活化腦部

根據日本嘅醫學研究顯示，人類嘅大腦需要不斷使用，才可以有效防止退化。而適量嘅性愛，可更有效刺激大腦皮層，所以性愛活動，係防止患上老人癡呆症嘅好方法，多做更可以令腦袋保持年輕活躍。

奇效五 紓解疼痛

好多人都唔知道，原來性愛同阿士匹靈有同樣嘅功效，其實美國性學醫療機構反覆做過驗證，證明性愛能刺激大腦中樞神經，分泌出胺多酚，對減輕疼痛好有幫助。一般輕微嘅胃部不適、肌肉痠痛、頭痛等，都可以通過性愛而有效紓緩！