勾仔良伴火星人

經過上次中日戰事雙贏局面之後，我足足飽咗成個月，整整一個月都冇出去食過仔。日日返工放工，間中同姊妹出去血拚，事關早前有百貨公司搬遷大減價，乜乜Owens、乜乜Lang，統統減到4、5折，我梗係唔手軟，立即掃餐飽，呢個月淨係Shopping都令我好滿足，細妹暫時未有投訴。不過話時話，我見到成間屋都塞滿衫褲鞋襪之際，突然間又有啲空虛感湧出嚟，成間屋只得自己同堆衫，好似毫無生氣咁！

其實做咗咁多年單身人士，都應該慣咗「人氣」單薄嘅感覺，不過可能因為新年氣氛太濃厚，令我突然間有感而發啫！最簡單又最直接將呢份空虛掃除嘅辦法，只有一個，就係出去食番餐好嘅！反正我都成個月未開過餐，係時候要接觸吓「陽氣」，調和一下我體內過盛嘅「陰氣」。於是我立即打畀溝仔良伴Ivana，佢個樣十足十火星人一樣，所以我每次拍佢出去釣仔，都一定滿載而歸，無他嘅，有比較嘛！

自己有時睇仔都係一樣，見完個好鬼醜嘅，再見番個正常啲嘅，都覺得Ichiban啦！就係咁，我哋蒲咗唔夠2個鐘，就已經勾咗4、5件仔埋嚟，又飲又跳，情緒高漲。不過我都算有良心，食唔晒嘅一定留畀佢，仲幫佢加多兩錢肉緊，保證大家都有着落先離場。幾件仔裏面，有件中日混血兒我真係冇興趣，因為之前食日本菜食滯咗，依家見到都驚，咁啱Ivana又好冧，我梗係二話不說撮合佢哋啦！話晒我都借佢過橋，又點可以過橋抽板呢……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。