小心過期假啤酒

內地夜場賣假酒已經唔係新聞,最近有部分夜場竟然賣過期假啤酒,真係離晒譜!據一位夜場經理表示:「老細落柯打話不論新客熟客,都一律賣過期假啤酒畀佢哋,但為免被客人識穿,頭兩Round會賣真酒,當客人飲到醉醺醺嘅時候,就全部送上過期假啤酒,咁就無咁易穿煲!不過,有啲客人好醒目,分得出真假啤酒,有次我試過畀客人攞支啤酒指住嚟鬧,為咗賠罪,惟有局住隊晒成支假啤酒,然後立即換過晒啲真嘅畀佢。」

其實佢都算好彩,事關另一位東莞夜場經理就因此而畀客人爆樽,話說當時客人發現啤酒過期,於是同經理理論,期間有人發難將支啤酒掟向經理,好彩只係中膊頭,否則必定會發生流血事件!

至於點先知道間夜場有冇蠱惑賣假啤酒?就要留意吓房內DJ或侍應點樣斟酒,如果响其中一盆開一支酒只斟畀客人,跟住又响另一盆開支真嘅畀囡囡的話,九成係有景轟,大家千祈咪飲啦!

劉夢吉