黃一琳 瀛格美少女

內地新一代嘅年輕模特兒，十居其九都以日系美少女嘅造型為主，而今日要介紹嘅靚女，更係當中嘅「女王」，皆因佢係內地一本著名時尚雜誌嘅首席模特兒：黃一琳。

黃一琳係地道北京靚女，今年23歲，未入行前喺北京電影學院讀書，期間佢兼職做模特兒，為一本中日合資嘅時尚雜誌拍攝硬照，目前佢已經成為呢本雜誌嘅御用Model，更同唔少日本模特兒合作，互相交流扮靚心得。

豬籠入水

一琳本身眼大大面尖尖，作日系美少女嘅打扮真係好「卡娃兒」，唔止深受攝影師喜愛，更獲得不少廣告商垂青，搵佢拍廣告同做代言人，收入可謂豬籠入水。近年一琳更作多方面發展，例如擔任旅遊節目主持，目的地當然係日本，能夠親身體驗日本文化，一琳話獲益良多，學咗好多嘢。唔知佢有冇去浸溫泉，赤裸裸咁體會當地溫泉文化呢？如果有嘅話，一定吸引成班麻甩佬跟住去齊齊浸。

波濤洶湧

最近一琳拍攝咗一輯性感內衣照，馬上被網友捧為性感偶像，雖然一琳嘅身材唔算特別火辣，但穿上性感內衣後，盡展線條美，戴上Push Up Bra更營造出波濤洶湧效果，噴血度爆晒燈，難怪呢輯內衣照喺網上轉貼率極高，同時令一琳人氣大增。而粉絲們更希望一琳拍多啲泳衣或內衣照，讓佢哋大飽眼福。可惜家陣天氣凍，睇嚟要等到明年夏天至有得欣賞啦！

黃一琳Profile

出生地：北京

三圍：33-23-34

身高：162cm

興趣：睇戲、逛街