迷人5呎5

今晚個月光特別圓，再加上我着咗對新買嘅Giuseppe火紅長靴，出去蒲一定可以滿載而歸，今晚我要落足眼力，飲多幾杯，傾多幾句，玩吓談情Feel。反正今晚心情唔錯，可以同陌生人做一晚朋友！今次同我一齊出嚟覓食嘅係Judy，容我喺度花少少篇幅介紹佢，事關佢係城中有名嘅女食家，某大品牌揸Fit人，一身行頭貴過我一個月人工，雖然我哋身份有啲距離，但勝在一樣咁為食，得閒傾吓食經，就做咗朋友，不過絕對唔係閨中密友，呢個年代嘅女人，最棹忌就係密友，睇少眼分分鐘連老公都畀人食埋，一次過愛情同友情都冇晒，真係好難受！

所以我同Judy係食友，出親嚟都係講飲講食，今晚佢帶我去咗間Private Club，冇佢帶路，平民百姓好難入場。既然有咁好嘅場所，自然有高質素嘅獵物。我哋慢慢飲住杯Champagne Cocktail，一邊(界)仔、一邊畀仔(目及)，終於有件5呎5行埋嚟。

首先，我真係唔介意男人矮，只會介意佢短，所以佢只要矮得均勻，我就覺得OK，問題不大。佢件西裝好貼身，我可以感覺到佢對胸就嚟逼爆件恤衫，不過幸好唔係淨係得對波，各方面都好配合，尤其是眼神，都幾迷人，笑起上嚟有個酒窩，好鬼Cute。我哋傾咗好耐，全部話題都不着邊際，不過去到最後，佢終於話想轉個地方再繼續，問我有冇興趣。

我望一望Judy，見佢已經翹實一個好有台型嘅男人，我再望一望眼前呢位，就知道咩叫竹門對竹門，木門對木門。其實咩門對我嚟講，又有咩緊要，最緊要係今晚，佢識得開我度門啫……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。