世界波：床上七宗罪：敗性而歸

乜嘢叫做「敗性」？咪即係任何令性愛變得失敗嘅事情囉。美國成人雜誌《Hustler》最近做咗一個調查，總括咗各階層讀者嘅意見，綜合出床上「敗性」7宗罪，無論你係男定女，都應該睇吓自己有冇衰其中一瓣！

呢7宗罪當中，有大部分都係個人習慣問題，亦有啲係因為自私而導致嘅，不過無論係點樣形成都好，一旦發現自己犯上呢啲罪行，都應該立即作出改善，否則日積月累下，性生活質素就會變得愈來愈差，伴侶遲早離你而去。

抗拒濕吻

有啲人覺得濕吻好惡心，又唔衞生，兩條舌頭交纏在一起，口水互相傳遞，聽落又的確幾核突。但其實同鍾意嘅人濕吻，係一種表達愛意嘅享受，體液嘅交流，亦有助提升性慾，令性愛變得更火辣。當然，對方一定唔可以有口氣問題，否則咀到Honey反胃作嘔就掃興啦！

立刻沖涼

激情過後，有啲女人會馬上跑入浴室，徹底清洗私家重地，咁嘅行為會令男人有被嫌棄污糟嘅感覺而產生不快。再者，劇烈運動後，立刻洗澡亦會對身體健康造成影響，不如同伴侶喺床上纏綿多一陣，再入浴室嚟個鴛鴦浴，反而對感情更有幫助。

半途避孕

好多男人都唔鍾意戴安全套，尤其同伴侶做愛，就更加想無拘無束。不過佢哋想開心又唔想生細路，於是就選擇喺中途或者臨近發炮嘅時候先戴上，其實咁樣嘅方式，對雙方都毫無好處。要喺中途打斷激情，倒不如一開始就戴定安全套，一氣呵成直衝到尾啦！

設計性愛

性生活需要幻想空間，呢點毋庸置疑，但並唔代表每次性愛都需要經過精心設計，或者每次都需要玩角色扮演，甚至其他花臣至可以得到高潮。一旦習慣形成，就等於患上某種「性癖」。凡事順其自然，偶一為之嘅小動作，先可以令性愛變得更完美。

要求提速

當兩人做愛做到如火如荼之際，突然間女伴喺男方耳邊嗌「快啲」，其實都幾令人掃興。可能男方已經喺女伴身上衝咗好耐，或者衝刺速度太慢，如果女人一味催促快啲完事，就好像一盆冷水照頭淋般令性事冷卻落嚟，所以有問題的話，都係留番事後檢討啦！

內衣不潔

雖然不修邊幅係好多男人嘅特徵，但保持內衣褲嘅整潔卻係十分重要，試想像伴侶喺床上幫你除褲嘅時候，先發現你嘅內褲黃黚黚，都幾倒胃口，女伴唔扣你分至奇，甚至以後都唔想再掂你。

過分潔癖

大部分女人都鍾意喺性愛前洗擦乾淨，但男人往往一撻即着，想做就去做，所以面對一啲有潔癖嘅女伴，有可能被折騰至性慾全消。為咗取得平衡，倒不如一齊沖番個鴛鴦浴當前戲，咁咪一舉兩得囉！