世界波:生果畫筆就手挑逗

如果每個人都肯動動腦筋發揮創意,其實家中隨手都有好多生活小用品可作情趣道具使用,令性愛更刺激、更享受。英國性用品網站向1,000名舊客戶收集意見,發現有5種家居小品,最容易令性愛變得更有趣味。

其實無論咩道具都好,最緊要係安全第一,以下5種家居小品,其實都係日常用品,只要適當地運用,自然夠安全,對於一般情侶或夫妻而言,呢啲小品有時仲比真正嘅性玩具更容易接受添!

催情水果

係人都知多食生果有益身體健康,真係估唔到生果仲可以令性愛更加有趣,其實隨便放一粒士多啤梨或提子喺伴侶嘅乳頭、大腿內側,然後慢慢品嘗,生果嘅汁液自然會流到伴侶身上,之後再用自己條靈舌,一一舔乾淨,便可以產生驚人嘅挑逗效果,令伴侶立時慾火高漲,熱情銳不可當,隨時勁過食催情藥,但副作用全無,健康得多!

魔法水彩筆

當然唔係人人屋企都有水彩筆,不過對於好多人嚟講,去文具店買支水彩筆一定冇去性商店咁尷尬囉!既然有同樣效果,又少啲尷尬情況,何樂而不為?不過一定要買支筆毛柔軟嘅先好,然後將伴侶嘅身體當成畫紙,無論畫上真正顏料又好,畫上蜜糖、果醬又好,總之過程都會令雙方樂趣無窮,觸發更多激情。

冰鎮敏感點

冰粒真係隨時隨地、打開雪櫃都可以搵得到,方便又唔使錢。只需將冰粒放喺伴侶最敏感嘅肚皮、乳頭、頸項上摩擦,冰涼嘅刺激感覺會令所有敏感點都酥麻起嚟。又或將冰塊含在口中,游走伴侶身體不同部位,令對方感受前所未有嘅冰涼感覺,既新鮮又刺激,自然令性愛變得更激。

羽毛搔癢

如果家中冇羽毛的話,求其搵一件有毛毛或者流蘇飾邊嘅衣物,效果都一樣。因為毛毛嘅作用主要係令伴侶嘅皮膚產生痕癢嘅感覺,令身體變得更加敏感,更容易進入狀態。最好從背部與臀部等區域開始,再掃至胸部、頸部,最後再到小腹及私家重地。對方全身嘅慾火都會畀你立時掃起,不過伴侶有皮膚敏感問題就千祈咪試喇!

領呔玩綑綁

每個屋企嘅衣櫃內,都總會有絲巾或者領呔,但係好多人卻忽略咗佢嘅情趣作用。例如利用佢綁住雙眼,就可以大大增加愛撫嘅觸感,如果利用佢綁住手腳,又可以增加性愛刺激感,滿足操控欲,簡直好使好用。

七瀨