波士食散餐

嘩！呢兩個男人真係令人大開眼界，佢哋明目張膽，直頭當我死嘅一樣，不過佢係我波士，我梗係冇Say啦！惟有當乜都睇唔到。Richard見我刻意迴避，於是更加猖狂，竟然拉咗送水壯男入房，過咗成10分鐘，兩人先至行番出嚟！我見佢哋兩個個樣難捨難離咁，真係冤氣。壯男走咗之後，我立即走去八吓，Richard衰衰咁話，大家都有Feel，仲約咗今晚出去。

我最鍾意見到人哋一雙一對咁甜蜜，尤其係波士，佢如果有多啲愛情滋潤，心情都會好啲，對我梗係有着數啦！雖然呢件壯男擺明就係散餐，要嚟調劑吓都冇壞嘅！況且佢又咁好身材，應該係一個床上戰將，所以我立即祝佢今晚「梅開二度」，佢畀我氹得鬼咁開心，笑淫淫咁返入房。我睇吓個鐘，原來已經4點幾，掛住八，差啲唔記得時間，手上仲有好多嘢未做呀！結果要開Turbo先可以喺8點鐘收工，波士當然一早就走咗！剩低我一個嘅Office，原來咁冷清，突然間有陣陰風吹過，都係快啲走先！

行到出大門，咁啱撞到Macy個衰婆，我先知原來陣陰風係由佢而嚟嘅！既然兜口兜面都冇得避，不如大方啲，同佢打招呼先。佢一見到我就四萬咁口，又想問啲衰嘢，我立即截住佢，不停講其他八卦嘢，佢終於畀我拉開咗話題，跟住好快我就借啲意走人，我自己都覺得頭先台戲可以攞足100分，為咗獎勵自己，我對腳又不受控地向ifc方向行，再加上天氣已經好有涼意，雖然仲差少少時間就大減價，但我實在忍唔住，睇嚟今晚我嘅銀包將會大出血……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。