世界波：後戲如甜品 房事更完美

隨住女人愈來愈敢於表達自己嘅性需求之後，男人一般都已經明白性愛前戲嘅重要性，但事後工夫卻仍然被忽略。大部分男人在終極一發之後，便倒頭大睡，令女人感到不是味兒。其實甜蜜嘅性愛，事前事後都同樣重要，就像飯後來一客甜品一樣，令晚餐變得更完美，試問有邊個女人唔喜歡呢？

美國性學研究中心向1,000對夫婦進行調查，發現有做事後工夫嘅夫婦，比做完愛後便各自倒頭大睡嘅夫婦，婚姻關係平均長三年，證明了事後工夫能夠增進夫妻感情，亦可以令性愛變得更完美，增進婚姻穩定性。以下三招，就係最普遍又最有效嘅事後工夫，男人如果唔想被扣分，係時候要學番幾招喇！

賽後檢討

高潮過後，女人仍然處於欲仙欲死嘅階段，男人最好把握機會，攬實女伴作賽後檢討，睇吓自己有咩地方令對方高潮迭起，又有咩地方需要改善。起初對方總會有啲怕醜，但兩人能夠坦誠相對，不但會令性事變得更完美，合拍度亦會提高。加上男人完事後同女伴分享，會令佢覺得自己備受重視，令感情更進一步。

閨房小玩意

閨房小玩意，唔一定要用喺前戲上，後戲都同樣可以！但應選擇簡單嘅按摩器、羽毛棒，或者一齊沖個泡泡浴等，以紓緩高潮過後嘅繃緊情緒。而泡泡浴更加可以將兩人之前嘅甜蜜感覺延續下去，唔好睇小女人對「甜品」嘅渴求，女人往往着重心靈上嘅滿足多於肉體上嘅快樂，所以男人就算喺床上幾威猛都好，一旦事後表現差勁，絕對有機會畀女人扣分。

梅開二度

雖然都市人嘅時間十分寶貴，但其實性愛係婚姻關係中好重要嘅一環，冇理由將佢變成得閒至做嘅配菜，所以每次性愛都要騰出足夠時間同空間，保證雙方都可以慢慢享受。

如果仲有精力，第一回合過後，男人不妨再接再厲，將第二回合嘅前戲，當做第一回合嘅後戲，就算最終未能梅開二度，伴侶亦唔會介意你嘅熱情表現，感覺自然更加滿足啦！