世界波：催情Food男人好識食

壯年男人各方面機能都處於旺盛嘅頂峰階段，當然唔使驚會有「軟着陸」事件出現，但美國性機能協會最近做咗個針對30至40歲、從事金融業男人嘅調查，竟發現佢哋因為長時間受工作壓力影響，令性機能比一般男士弱好多，約每20次性愛中，就有1次出現「軟鞭」情況。想喺床上爭取最佳表現，原來簡簡單單靠食療就可以。據統計，25歲之前，男人平均每日可以勃起高達7、8次。當然，30歲後嘅男人開始進入事業搏殺期，自然對性需求有所下降，但係減少需求唔等於唔得，男人出現唔得嘅情況，就會對心理構成好大壓力，甚至連工作表現都會有不良影響。所以凡事都應該防患於未然，就算依家仲好得嘅男人，都應該多食以下嘅補品，以確保每次性愛都有最佳表現。

雞蛋提供動力

雞蛋能提供充足嘅維他命B，係人體保持性動力同埋鬆弛神經嘅重要營養素。一旦感到焦慮不安或者神經緊張，維他命B都係體內最先耗盡嘅營養素。所以一定要保持體內高水平嘅維他命B，至可以輕鬆面對壓力，仲有助做愛時候嘅雄風，甚至減少早洩發生添。

據說阿拉伯人喺婚禮前幾日，會以葱花炒蛋作為主要食糧，以確保新郎哥喺新婚之夜有威猛表現。印度嘅醫生則建議每次性愛前多食用以雞蛋、牛奶、蜂蜜煮成嘅大米粥，可有助男人保持源源不絕嘅動力。

雲呢拿雪糕高潮更持久

好多人都鍾意食嘅雲呢拿雪糕，原來可有助男性增強持久力，因為佢具有鈣質同埋磷質，能為肌肉提供能量儲備，間接增強男人嘅性慾。每100克雪糕中，鈣含量約有128毫克，可令男人嘅高潮更加持久有力。

另外，芝加哥嗅覺與味覺治療研究基金會嘅研究亦發現，雲呢拿香草嘅氣味會令人感到鬆弛，減輕焦慮同埋壓力，分分鐘食雪糕仲好過壯陽藥。

芹菜發情訊號

含豐富纖維嘅芹菜，係激發性生活嘅「調酒棒」。美國性學專家研究發現，每一根芹菜都包含對女人充滿誘惑嘅氣味，當咀嚼芹菜時，呢啲氣味分子擴散到口中，再順住喉嚨爬升到鼻腔內，隨即催動男人嘅情慾，喚醒男人嘅性意識之餘，亦會令身體發放原始嘅性魅力，等同動物嘅求偶訊號一樣，異性自然會受到吸引。