世界波：爆肌渠王 冧死洋女

美國自從金融海嘯之後，經濟一落千丈，引發最近嘅佔領華爾街事件，可以想像美國人對金融從業員愈來愈反感。根據一本美國成人雜誌嘅調查報告顯示，一千名受訪女人中，有50%想搵個從事體力勞動嘅藍領階層做男友，當中尤以「渠王」最受歡迎。

呢份調查報告話，美國有愈來愈多女人渴望搵個「渠王」做老公，亦有30%女士想同上門修理水管嘅猛男發生艷遇，除咗因為「渠王」有專業技能之外，其實佢哋喺美國好好搵，平均一年收入有十萬美元，好過好多打工仔。香港男士係咪應該諗吓轉行學通渠呢？

另類通渠服務

喺好多女人心目中，「渠王」嘅形象一定係滿身肌肉，手臂強而有力，蹲下修理時牛仔褲會繃出堅挺嘅靚股。佢哋咬緊牙關做嘢嘅時候，面上流露濃濃嘅男子氣概，加上Tee恤底下若隱若現嘅胸肌，寬大厚實嘅肩膀，再加埋佢哋認真工作時嘅樣子，不拘小節嘅男人味等等，簡直令女人睇到個心卜卜跳，足以引起女性某種賀爾蒙產生變化，性慾突然高漲起來，恨不得撲上前，請「渠王」進行另類通渠服務。

安全又實用

大部分女人都覺得家中嘅男人一定要夠實用先正斗，無論係收入、生活同埋上床，都一定要令女人覺得好有安全感，先為之好老公。所以調查報告話女人愛上「渠王」其中一個重要原因，係覺得屋企如果有佢哋喺度，無論咩時間發生咩大小事故，都唔怕拿手唔成勢，可以即刻搵佢去修理。再加上佢哋經常從事體力勞動，身體自然夠晒強壯，絕對係有高度安全感又實用嘅好老公之選。

收入唔講得笑

「渠王」呢類藍領職業喺歐美國家大多屬於「自僱人士」，屬高收入嘅職業類別，普遍年均收入比一般美國人高出兩至三倍。據《澳洲時報》報道，喺從事建築行業嘅工人中，「渠王」係收入最高嘅工種。澳洲有好多地區，都十分缺乏「渠王」，所以佢哋喺當地嘅人工就愈來愈高。

市面上一般已經好難搵到開價低於千多美元日薪嘅渠王，所以喺美國，「渠王」絕對係高收入人士，可以生活得很好。即使係初入行者，平均每年收入都達四萬到五萬美元之間，難怪女士們對呢批藍領中嘅「勞斯萊斯」愈來愈嗒糖喇！