世界波：成人鹹趣事 唔講你唔知

有研究話男人大腦聯想起情慾事情嘅區域比女人大，幾乎每52秒就會諗起性事，唔怪得我哋對四仔、寫真集、鹹相咁留意啦，之但係咁亦唔代表女人就唔鹹濕，只係口味有時比較獨特，佢哋對女同、男同場面反而更感興趣，聽吓專家點講先！

美國嘅成人娛樂事業蓬勃，佢哋唔單止國際化，仲企業化，而且成人娛樂更被視為一種文化同藝術，所以有好多大學都針對佢哋進行研究。喺過程中，仲發現到唔少同性事有關嘅有趣現象添！

發現一：女性口味奇特

美國西北大學曾經進行過一個有關男女對欣賞邊類型鹹片比較興奮嘅研究。結果發現大部分男性皆目標明確，一見到男女激烈決戰就會好興奮。

至於女性則比較奇怪，正常嘅男女性愛未必能夠撻着佢哋嘅情慾，反而女女交歡、男男交歡，甚至係生態紀錄片成日都有嘅動物繁殖實況，更易挑起女性性慾。唔怪得講「Boy's Love」（BL）嘅漫畫咁受女仔歡迎啦。以後大家買鹹片同女伴欣賞時，不妨買多隻「另類」作品，分分鐘可以帶來意想不到嘅催情效果o架！

發現二：男人愛睇樣

作為一個狂熱巨乳迷，小弟欣賞三仔、四仔時，一定要揀個上圍至少有E Cup或以上嘅女優先至睇得過癮。不過，上圍只得C Cup嘅小川亞沙美，竟也令我神魂顛倒。點解呢？

睇完印第安納大學嘅研究我就知道喇，因為研究發現，原來女優最易令男人興奮嘅身體部位，並唔係乳房、纖腰、玉臀或美腿，而係雙眼同嘴唇，小川亞沙美對電眼勁迷人，唔怪得電到我「渾渾沌沌」啦！

發現三：避孕丸影響

承上，印第安納大學嘅研究亦發現，有服用避孕丸嘅女性，較鍾意欣賞鹹片嘅角色造型、背景以及故事結構。相反，冇服用避孕丸嘅女性，則尤其留意男優嘅命根。

專家解釋，冇服食避孕丸嘅女性，較容易撻着情慾神經，所以唔需要靠劇情嚟醞釀性慾。

發現四：係男人都睇過鹹片

睇到呢度，係咪笑咗出嚟呢？皆因蒙特婁大學嘅研究員，曾經意欲研究睇鹹片對男人嘅性生活有何影響。大家都知道，要做研究，一定要做對照實驗，即係要搵一啲完全冇睇過鹹片嘅男人嚟做對比，結果該研究員無法於校內搵出合資格人士，可想而知鹹片嘅威力真係無遠弗屆。

發現五：選舉結果 影響性慾

維拉諾瓦大學嘅研究員發現，美國前總統喬治布殊於2004年連任總統嘅時候，其所屬政黨共和黨所控制嘅州郡，市民搜尋鹹片同鹹相嘅次數大幅提升。而奧巴馬於2008年當選總統嘅時候，由民主黨控制嘅州郡亦有相同結果。專家解釋話選舉勝利，令支持者體內嘅睾丸胴素大量飆升，所以對性嘅需要亦隨之而提升喎！唔知嚟緊嘅區議會選舉，有幾多選民會走去睇四仔呢？