世界波：浪漫前奏悶親女朋友
前奏工夫對曳曳嘅質量有好大影響，為咗得到一次回味無窮嘅床戰，唔少人都喺前奏度絞盡腦汁，希望撻着彼此慾火，入正題時就能如魚得水。不過早排英國有調查發現，一啲男士以為女人好受落嘅浪漫前戲，竟然令女伴覺得冇新意兼掃興，大家睇完就知道邊啲唔應該做喇！
呢個由英國某電視台嘅生活與健康頻道所進行嘅調查，成功訪問咗4,000多位成年女性，發覺喺佢哋心目中，最討厭嘅前奏竟然係飲酒！其次分別係用餐時間過長，埋牙前睇悶爆情慾電影等。有受訪者表示，呢類悶爆兼惡頂嘅前奏，令佢哋對做愛嘅興致大打折扣。
No.1 飲酒未必助興
唔少男士以為事前飲番幾杯，床戰時更加容易動情同興奮，但原來好多女人都唔認同！唔少受訪女士認為，床戰前飲酒，最難忍受嘅係對方嗰陣惡頂嘅口氣同酒氣，而且唔少男士一拎起酒杯就停唔到，結果往往飲到半醉先收手。試諗吓，要女伴同個半醉男士床戰，仲要忍受佢陣酒「徐」，又真係幾冇癮嘅！
No.2 幾粒鐘晚餐
先嚟個浪漫嘅燭光晚餐，再同女友上床曳曳，感覺係咪好銷魂呢？事實上，一頓美味晚餐確係起到調情作用，但如果用餐時間過長，不但引唔起女伴嘅性趣，仲會令對方覺得沉悶添！
有受訪女性指出，英國男士以為法式晚餐夠羅曼蒂克，卻冇諗過法式晚餐用餐時間勁長，有時講到冇話題，尾段全程Dead Air，一啲氣氛都冇，仲妄想有下文？
No.3 扮藝術情慾片
唔少情侶有睇四仔作為床戰前奏嘅習慣，但有啲男士卻鍾意搵啲藝術性情慾電影嚟做前奏，以為感覺高檔啲，一樣可以好似四仔咁挑起女伴嘅慾火，點知卻弄巧反拙。皆因情慾電影同四仔有好大差別，前者愛賣弄唯美拍攝手法，有時仲為咗表現出「深度」而拍得好「虛無」，結果女伴好多時未睇完就已經瞓着咗，情願搵周公切磋好過！
專家解說
著名性愛指南作者Tracey Cox認為，其實用酒精、食物同情慾電影作為前戲，效果未必如受訪女士所講咁唔理想。令佢哋感到沉悶嘅原因，只係因為男方唔識得控制時間同製造氣氛，以致對方大感掃興。只要把握時機，上述三種前奏方法，不但唔會令女伴冇癮，仲會大大提升性愛樂趣添！