世界波：Lazy Men係女都驚

所謂「各有前因莫羨人」，當大家見到一個靚女拖住嘅男友，居然係一名同你同我一樣其貌不揚，甚至可以話係醜男一名嘅時候，可曾想過，此男可能身家千萬，又或者係床上高手，至少唔係一名懶到出汁、係女都驚嘅床上賤男先啦！

有前輩話：「男人不壞，女人不愛。」的確有好多浪子型男風流瀟灑，高大威猛，但係對於愛慕其人嘅女性卻係刻意玩弄，之不過對方愈被玩弄就愈鍾意佢。當然，無論樣貌同身家都只屬一般，甚至比一般水準更低嘅我哋，要做壞男人，實在冇資格。不過大家都唔好介懷，因為早前有研究發現，有服食避孕丸習慣嘅女性原來比較鍾意顧家嘅住家男人，所以若然你嘅愛人有此習慣，咁就麻煩閣下修心養性，畀多啲時間陪另一半，唔好再同班豬朋狗友去蒲喇！

床上賤男

然而大家雖然肯做，甚至已經做到好男人嘅標準，但係正如大家要求老婆要入得廚房、出得廳堂，上床仲要夠狼，女人都可以要求男人上到床唔好做賤男。至於何為床上賤男呢？例如半途冇力、性技差劣、只顧自己享受、不理伴侶感受等等，最多只被歸類為冇用嘅男人啫，而床上賤男則衰在「懶」，若然你都有以下懶特徵就要戒咗佢喇！

特徵一　懶做前戲

雖然話時間就係金錢，但做愛應該係一種享受，所以敬請大家切記正式埋牙之前做多少少前戲，正如打邊爐都要水滾至可以淥熟塊肥牛啦！同女人上床亦一樣，千祈唔好急急忙忙進行，最緊要做足前戲。而前戲其實好簡單，唔一定要用你條三寸不爛之舌游走對方全身，簡簡單單嘅肩頸、大腿、小腿按摩都可以係愛撫前戲，以後就唔好再咁懶，嚟個大躍進，一上床就埋牙喇。

特徵二　懶講情話

氹女仔上床之前，大家可以用盡心機，編出綿綿情話以令對方心如鹿撞，繼而半推半就咁同你共赴巫山。之不過上到床大家嘅思想卻已經往下轉移，改用胯下之物主導自己嘅各種行為，咁就令女人覺得你壞透喇。事關無論係男人定女人，都冇辦法同此類無骨之物溝通，要同女方傳遞愛意，都係靠把口說出情話最好不過。而情話千萬不能夠簡短，例如：「爽唔爽？」「要唔要嚟多次？」麻煩加多少少前文後理，轉用「頭先我錫你條頸嘅時候，舒唔舒服呀？」嚟代替，伴侶即刻冧好多。

特徵三　懶得讚揚

進行付費一夜情嘅時候，收費嘅一方為取悅對方，即使技巧不高，把口亦必會全力以赴話：「你好勁呀！」「你搞到我好High呀！」其實大家早知道自己能力有限，故了解此話出自虛情假意，但係聽在耳裏亦不免深感自豪。同一道理，你嘅床伴若然真係死魚一條就冇得講，若然肯為你付出少許勞力，為你「擔擔抬抬」，又叫多兩聲，咁就請你唔好吝嗇，讚一讚啦！

特徵四　懶改習慣

好多男人以為今次呢個打扮可以引得異性垂青，下一次出動又照辦煮碗，以為必定冧莊啦。不過，一本通書不能睇到老，你自己都要求伴侶於床上玩吓角色扮演增加新鮮感啦。當你回憶起對前度伴侶作嘅某一個動作，能夠令對方興奮若狂嘅時候，切忌以為同一動作可以令現任伴侶同樣興奮，因為每個女人嘅特質都唔同，千祈呼懶醒唔得醒呀！

以上幾種行為都極度令女人反感，唔想做床上賤男，各位兄弟係時候要改變吓喇！