世界波：6大星座愛出軌

星座一向係外國最流行嘅占卜術之一，好多女人對星座嘅預測同分析，更加言聽計從，就算搵男朋友都要計過星座，睇吓大家夾唔夾先開始。其實星座除咗預測運程同分析性格之外，仲可以透露出軌指數，推測佢嘅偷食機會有幾高！

出軌王：雙魚座

出軌指數：★★★★★

原因：受唔住誘惑

雙魚座喺星座嘅分析中，受到代表夢想嘅海王星所主宰，平時已經成日墮入自己嘅幻想之中，一旦遇上別人嘅甜言蜜語，就更加難以把持。再加上雙魚座最難忍受平凡嘅婚姻生活，試問有邊一對情侶，能夠結婚10年後，仍然保持新鮮感同刺激感，就算有都係少之又少。所以雙魚座男女的伴侶如果是個大悶蛋的話，就應該更加容易出軌。

出軌心理：希望搵到更多心靈寄託，幸好行動力唔算強，所以精神出軌機會率更大。

預防措施：搵個有藝術氣質，可以不停製造浪漫嘅伴侶。

開放王：金牛座、山羊座

出軌指數：★★★★

原因：接受有性冇愛關係

呢兩個星座都係慾念高漲嘅星座，十分享受性愛嘅樂趣，擁有強烈嘅慾望，自然比一般星座嘅性需求更大。佢哋出軌嘅原因，主要係因為要享受性，同伴侶之間嘅愛可以無關，即是話，佢哋一方面可能仲好愛伴侶，但係肉體卻因為控制唔到性慾而出軌。要對症下藥，一定要改善跟伴侶之間嘅性生活，從而得到滿足，不假外求。

出軌心理：希望尋找短暫而刺激嘅性慾，因此容易向外尋求。

預防措施：盡量搵一個可以配合自己強烈慾望嘅伴侶！

衝動王：白羊座、人馬座、獅子座

出軌指數：★★★

原因：因衝動一時失足

呢三個星座都係屬於衝動熱情嘅類型，永遠唔會三思而後行，而且最容易受他人慫恿，若然再加上酒精刺激，就好容易出事，加上佢哋本身嘅道德標準唔高，更加容易因衝動而犯下一時嘅錯失。雖然事後可能會好懊悔，但當下次遇到同類事情，又會重蹈覆轍。要改變呢種出軌模式，一定要從改善性格方面着手，減低自己嘅衝動指數，自然可以避免犯錯。

出軌心理：純粹衰衝動，又受不住朋友慫恿，最終一失足成千古恨。

預防措施：學習修心養性之道，戒急忌躁，遠離豬朋狗友。