陪客心態出遊

當Richard見到我臉上嘅姣笑，立即想作嘔，不過佢都好有紳士風度，扮到若無其事咁慢慢行返入房，跟手關上房門，我望見房門關上，先知道自己剛才有幾瘀，真係想搵窿捐，不過又冇得走，惟有硬住頭皮死頂。之後成日我都冇再同Richard溝通過，唔知係佢頂我唔順，定係我實在太瘀嘅關係，呢日好快就相安無事咁過咗。

去到臨收工時分，我接到Macy嘅電話，先醒起我早前嘅行賄相當有用，因為佢喺電話度透露咗最高層準備聽日有所行動。之後，我梗係第一時間話畀Richard知，等佢有所準備，就算冇得掹，聽日開大會都唔使畀人窒到口啞啞。

Richard好感激我嘅冒死相救，佢原本想請我收工食餐勁嘅，不過佢最終都決定約佢嘅背後人物商討對策先，所以話無論事情發展成點，佢都一樣欠我一個大人情，之後一定會雙倍奉還。我聽得出佢幾有誠意，所以我都好衷心咁安慰咗佢幾句，雖然實際作用唔大，不過心理上都有啲效果嘅！不過喺呢個時候，我又再次收到Macy嘅來電，佢話尋晚個「佐治古尼」好鬼正，搞到佢之後個心囉囉攣，好想去撞多佢一次。我一聽就知佢又想攞着數，鬼叫女人都係鍾意貪小便宜嘅動物咩！

不過我尋晚先至食完一劑十全大補品，今晚無論如何都唔會肚餓，所以我都係本住陪客嘅心態出遊。今晚可能係禮拜四嘅關係，人丁的確係少啲，尋晚又玩完Ladies' Night，係人都等聽日先出嚟啦！我望一望身邊嘅Macy，真係估唔到佢仲大食過我，我見佢雙眼好似麻鷹一樣，唔放過任何合眼緣嘅獵物，佢根本就唔係想搵佐治古尼，都唔知佢尋晚搞乜鬼，如果真係好正，冇理由餓成咁o架，我忽然間好有興趣想知道……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。