世界波：7招必殺技高潮湧住o黎

性慾係人類與生俱來最原始嘅慾望，所以任何人都應該好好享受呢份上天賜與嘅禮物。不過好多女人唔知係咪因為太過保守，或者太過被動，喺性愛過程中，往往享受唔到高潮嘅樂趣又唔出聲，其實女人冇得「Come」，男人都一樣要負責！

男人好多時都忽略咗一啲好簡單嘅生活情趣，而佢哋亦唔知呢啲情趣可能同女人嘅高潮有關。因為女人嘅生理構造好複雜，高潮係需要心理同生理同時配合，先可以達到，所以想女人Easy Come，不妨試吓以下嘅簡單法則。

1.身體接觸

在家時不妨同女伴多些身體接觸，例如兩人擦身而過嘅時候，可以突如其來畀伴侶一個親吻或情深擁抱，通過簡單嘅身體接觸，女人嘅慾望隨時可以燃點起嚟！

2.深情眼神

當你同女人親熱或者接吻嘅時候，偶爾可以擘大眼，用誠懇嘅態度望住對方，呢個時候，女人不但會覺得你好冧佢，更會接收到你眼中嘅深情訊息，慾火自然更高漲。

3.時有新意

長期用一種方式做愛，係人都悶！所以男人應該不時喺床上帶來新意，嘗試於不同時間、環境、地點，以不同姿勢嚟曳曳，效果一定比你預期嘅更好。

4.對症下藥

如果女人真係出現高潮困難的話，不妨鼓勵對方嘗試用自慰嘅方式嚟得到滿足，因為始終自己嘅身體自己最熟悉，搵到撻着高潮嘅按鈕，男人先可以對症下藥。

5.保留空間

雙方都需要有適當嘅性幻想，先可以令性愛保持新鮮，思想上嘅出軌有時候係防止真正出軌嘅好方法，所以伴侶之間應該保留一啲私密空間。

6.製造浪漫

浪漫溫馨嘅貼心行為係大部分女人都受落嘅招數，例如朝早為佢預備愛心早餐，晚上沖完涼後為佢按摩肩膊；間中出外撐枱腳等，都足以令女人內心泛起漣漪。

7.言語挑逗

縱使你對伴侶嘅身體好熟悉，當你發現對方着咗件性感浴袍嘅時候，都應該向佢表達你被佢吸引而舉旗不定，呢種被寵愛嘅言語挑逗，好容易令女人春心大動。