滋補有代價

雖然「麥迪文」畀我夾到實一實，但仍然好似頭野獸咁死衝，事關佢都將近去到頂峰，唔衝唔得，終於喺一輪急攻之下，我同佢齊齊攀上峰頂，震撼感覺足足持續咗一分鐘，真係幾回味。然後佢好似死屍一樣伏喺我身上，我冇即刻將佢推開，算係好畀面，就當係回報佢今晚咁出色嘅表現。

可能頭先砌得太搏命嘅關係，依家全身都好似虛脫一樣，為咗聽日副尊容着想，都係瞓番覺好嘅先，要知道女人唔夠瞓，個樣會殘得好快。

第二朝，陽光從窗簾嘅夾縫中滲透入嚟，剛好照到我面上，哋嘅感覺終於將我整醒，我本能反應咁轉身望望隔籬，發覺床上已經空無一人，我再望一望手錶，原來已經九點幾。弊！使唔使咁好瞓呀，今日想唔遲到都唔得，為免畀人背後插一刀，都係報定案先。

我用咗最極速嘅時間梳洗，將自己最美麗嘅一面重現，唔知係咪尋晚好鬼爽，又瞓到好似跳咗掣咁樣，今朝個樣真係幾潤，十足十食咗成個月燕窩咁。男人有時真係幾抵讚，如果遇到好對手的話，直情滋補過食燕窩！

離開酒店嘅時候，我去Check Out，心諗佢應該一早埋晒單，點知酒店職員喺呢個時候，拎咗張單出嚟，剎那間我真係有啲Shock，不過好快就掩飾咗，順手攞張卡出嚟埋單，一邊簽名、個心就一邊詛咒「麥迪文」。邊有男人咁孤寒先得o架！雖則話佢床上表現真係唔錯，但都唔使女人出埋房錢呀，愈諗就愈o架，下次再畀我遇到佢，佢就知死。

返到公司啖氣仍然未消，黑晒面咁做嘢，搞到老細Richard以為我發生咩事，又遲到又黑口黑面。佢都唔敢惹我，仲問我使唔使請半日假，我抬頭望一望佢，突然間覺得佢真係幾可愛，如果佢唔係攣嘅，我應該可以同佢更進一步。諗諗吓，臉上浮現咗個好姣嘅笑容……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。