波士唔係大奸狗

買完鞋之後，頭腦真係清晰好多，因為尋日畀買鞋嘅欲望蒙蔽咗，好多嘢都諗唔真，經過兩個鐘嘅血拚之後，我終於清醒過來。第二朝一早就返到公司，仲喺公司樓下撞到Macy，立即叫佢幫我繼續收風，仲約咗佢今晚去食飯，順便講吓是非。Macy一聽到有是非講，即刻話OK。我返到五樓，全層都好靜，但係波士已經返咗嚟，我立即覺得唔係幾尋常，做得波士邊有咁早返工吖，一定有麻煩事發生咗。

我不動聲色，等佢自己搵上門，果然我櫈都未坐暖，佢就叫咗我入房，仲叫我順手閂門，好似好神秘咁。「Barbara，我哋雖然唔係合作咗好耐，不過我直覺你係信得過嘅人，所以我都開門見山，想問你最近有冇收到啲咩風？」我心諗斷背男真係Emotional啲，同我識咗冇耐，就話我信得過，食咗你都未知，好彩我Barbara本身都唔係壞人，如果唔係佢死10次都未知自己衰咩。

我扮晒天真咁問：「冇喎！我冇收到風，究竟發生咩事？」波士眼神流露咗一啲疑惑，但係都奈我唔何！於是佢冇再講落去，仲安撫我話冇事，叫我繼續如常做嘢！其實我喺呢間公司10幾年，有咩未見過？眼見都換咗5、6個老細啦，難道我會食唔落飯咩！佢真係太過Naive。不過咁有咁好，證明佢唔係大奸狗，我可以有藉口畀自己幫佢一把。

今晚Macy餐飯應該都唔慳得，如果我冇記錯的話，佢嘅線人費除咗餐飯同小禮物之外，最好加多個男人，咁就萬無一失……

（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。