孤身作戰避是非
有鳳姐鍾意聯群結黨咁做生意，幾個姊妹分租同一層或同一大廈幾個單位，然後齊齊開工，互相照應，以策安全。不過，有囡囡則喜歡孤身作戰，好似喺元朗安寧路，鳳樓林立，十居其九都係有黨派開檔，唯獨一個叫開心嘅陀地鳳喜歡自己一個人開竇，問佢點解唔聯群結黨？阿妹就話：「幾個姊妹喺同一層單位開工的確有好處，但同時亦有唔少壞處，例如成日圍埋賭錢，事關未有客人，就會玩啤牌打發時間，鋤Dee、鬥地主、十三張瓣瓣賭，有時手氣差，真係搵埋唔夠輸，最慘係你唔賭都唔得，皆因啲姊妹就會話你扮矜貴，焗住你要落場，而且一有錢銀轇轕，難免會傷和氣。除咗賭，有時為咗客人都會搞到不和，例如有客人上嚟先搵A小姐，但下次去搵B小姐，如果A小器，就會話B搶走佢啲客，其實大家响埋同一層樓，客人走嚟走去，邊有話係邊個o架，所以計過數始終都係做獨家村好，免得太多是非呀！」