奇聞趣事：Goodbye My Love

我穿着整齊咁行出廳，見到佢一臉甜蜜咁望住我，真係唔知點回應好，雖然話我嘅人生目標係嫁個有錢人啫，但依家我都仲未玩夠，仲想集多幾年靚仔先收手，萬一畀個男人黐上身，我仲使出嚟玩嘅？

眼前呢件「226」筍盤，到底點處理好呢？就咁話個事實畀佢聽，實在太傷佢心，我亦唔想晨早流流就Hurt人，所以最後我決定做一場戲。佢見我企喺度吟吟沉沉咁耐，覺得好奇怪，我立即行埋去坐低，用最情深嘅眼神回應佢嘅甜蜜笑容。

結果，我哋食咗個好愉快嘅早餐，腸仔煎雙蛋一向係我最愛，不過尋晚先食完，今朝又食，好似有啲膩，所以我都係速戰速決為妙。今日係星期日，佢好想我陪佢去遊山玩水，我一聽見就知道有位甩身，我立即用最正經嘅態度拒絕佢，仲表明自己係一個事業型女性，星期日都有好多要務纏身，叫佢千祈唔好諗得太多，就係咁樣，佢開始明白我嘅意思。我拿拿聲飲埋杯咖啡，就起身走人，臨走前仲嚟咗個法式Goodbye Kiss。

出咗「226」嘅大閘，我見到對面公園門口有隻流浪貓，懶洋洋咁瞓喺地下曬太陽，忽然間我好想同佢一齊曬太陽，於是我靜靜雞行埋去，踎喺佢附近，佢竟然冇拒絕我嘅加入，雖然頭頂嘅熱力足以令我3分鐘後暈倒，但呢一刻嘅心情，愉快到難以形容。一邊同花貓曬太陽，一邊回味口腔內淡淡嘅咖啡餘香，呢個就係我最想要嘅星期日……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。