南非女High爆全球

女伴是否得到性高潮，係唔少男士關心嘅課題，更係好多人同女伴親熱完後必問嘅問題之一！男士咁關心女伴有冇高潮，除咗因為體貼對方外，講到尾都係想肯定自己嘅床上表現，睇吓能唔能夠讓對方滿足。早前某知名安全套品牌做咗個調查，睇吓邊個國家嘅女性最能得到性高潮，估唔到南非竟然以大比數勝出！

呢個喺全球26個國家進行嘅性高潮調查，成功訪問咗26,000個成年女性，當中除咗問及佢哋有冇同埋係咪經常得到性高潮，仲問埋佢哋嘅年齡、教育水平、工作等背景資料。問得咁仔細嘅原因，無非係想以更全面嘅數據嚟分析，女性得到性高潮嘅因素。

南非居冠

調查結果顯示，南非嘅女性係全球最性福嘅女人！事關有高達87%嘅女性表示，佢哋曾經得到，或經常體驗到性高潮。而西班牙、墨西哥同意大利，則有65%女性得到性高潮而並列次席。可能有人覺得，曾經得到性高潮，並唔代表經常有，又點證明佢哋最性福呢？原來喺呢87%表示有過性高潮嘅受訪女性中，有77%嘅女性係經常得到性高潮，比率可謂相當誇張！

有分析員就認為，南非女性之所以有咁高嘅高潮比率，皆因呢次調查綜合咗同男伴性交，同使用情趣玩具自娛嘅性愛方式，而後者比真箇銷魂嘅性愛，往往更易得到性高潮，加上南非女性使用性玩具相當普及，故此較易得到高潮一啲都唔奇！

中港甚低

睇完最高排名嗰幾個國家之後，相信有唔少人關心，究竟香港女性有幾多人有性高潮呢？呢次調查將中國同香港嘅女性合併計算，結果發現只有24%嘅女性有過性高潮，相對排第一嘅南非嚟講，只不過係人哋嘅四分之一左右，真係畀人拋離成條街呀！

不過各位男士又唔使因為呢個數據而覺得沮喪嘅，原來身為亞洲AV大國嘅日本，亦只係高中港少少，僅有27%嘅女性得到過性高潮。作為一個AV大國，點解日本女性咁少人得到性高潮呢？分析員就認為，好可能係同女性嘅觀念有關。

相對於西方，亞洲女性性觀念比較保守，亦鮮有同男伴有賽後檢討。喺咁嘅情況下，女性為咗討好男伴，往往會假扮有性高潮，以滿足對方嘅心理，但事實上卻係一啲Feel都冇。

快樂泉源

其實呢個分析亦不無道理，皆因縱觀成個調查報告，可以發現位居前列位置嘅，都係以西方國家為主。既然係咁嘅話，究竟有乜辦法，可以提升女性得到性高潮嘅比率呢？

有性愛專家表示，其實東西方女性嘅生理結構並無分別，只係尋找快樂嘅方式各異而已。相對於亞洲地區而言，西方女性更樂於接受新鮮嘅玩法，除咗情趣玩具外，亦鍾意喺性愛中，加入角色扮演、愉虐、特別性癖好等嘅玩法，務求搵出一種男女雙方都能夠得到樂趣嘅性愛方式。其實只要放開心理枷鎖，人人都可以得到性高潮o架！