醉娃焗錢
好多朋友到內地夜總會玩樂嘅時候，都好鍾意灌醉囡囡，佢哋話囡囡飲到醉醺醺，玩得零舍豪放，但實際上囡囡飲醉酒，未必係件好事。話說我老友前兩日去咗常平一間夜總會玩，佢柯打咗三打啤酒，不過囡囡飲咗半打之後，就已經醉到不省人事，於是老友要求媽咪換女，但媽咪話要先畀囡囡嘅小費，否則唔會換新女入嚟，老友無奈照畀。跟住媽咪就帶咗另一個囡囡嚟招呼老友，而呢個囡囡飲咗半打唔夠，就嘔到一地都係，老友即刻叫服務員嚟清理，對方則表示要額外付一舊水清潔費，老友焗住再畀錢。點知清理完之後，囡囡突然發酒瘋，喺房內大吵大鬧不特止，仲拉住老友逐間房搵人隊酒，搞到神憎鬼厭，最後老友怕鬼咗佢，立即埋單走人，所以話灌醉囡囡唔係咁盞o架咋！