世界波：三人行有冇計？

二人世界過得耐，好易覺得悶，所以追求新鮮感嘅男人會四圍偷食。不過家陣男女平等，男人去得滾，女人都一樣可以不甘寂寞，紅杏出牆。唔想戴綠帽，但又想為沉悶嘅關係帶來火花？有專家就話搵多個第三者加入平淡如水嘅關係，間中玩吓3P，有助夫婦重拾性愛樂趣，但咁樣做會唔會引火自焚o架？呢個咁令人爭議嘅提議，原來係由網站Ask Dan and Jennifer內嘅一篇文章所提出。撰文嘅Michael Andrews表示，將第三者帶到床上，絕對可以增進男女之間嘅感情，仲可以令交歡時冇咁悶。

不過隨便帶個第三者返屋企，一屋兩妻雖然聽落好過癮，但10個女人10個都唔肯，即時嗌分手都有之，呢個提議會唔會有啲不切實際呢？Michael Andrews就話只要以下三項做到足，三人行未必唔可行！

一：藉詞為咗大家好

好多議員於選舉之前都話自己全心全意為人民服務，但實際上都係為咗份人工以及周邊嘅津貼同福利。當然，要向愛人表示外出偷食，真正嘅心意當然要藏於心底，而向愛人提出嘅時候，亦最好先作鋪排。例如表示自己咁做係為咗改善大家嘅關係，提出三人行只係想重燃激情，一心為大家着想，先至會想將第三者帶入屋，直情將自己當係聖賢一樣咁偉大，伴侶實會心軟答應！

二：表示兩個都咁愛

冇人講過唔可以一餐入面食乾炒牛河又食揚州炒飯，只要有胃口食得落，我叫多個肉絲炒麵都仲得。不過，最重要就係唔好狼吞虎嚥，否則怎能品嘗箇中味道？

同一道理，面對兩段感情，最重要就係識得向對方表示尊重同愛護，而你就係對方最可信，並且絕對唔會傷害佢嘅最佳情人。千祈唔好向A表示最愛佢一個，而B只係玩玩吓。掉轉頭又向B講同一番說話，咁樣會令你覺得非常有罪惡感，若然兩女不約而同向對方表示，由你口中知道對方只係玩玩吓，咁樣遲早穿煲。反而認真表示兩者皆愛，但程度有分野，仲易得到女方接受。

三：Keep住吸引力

好多男人喺享受到齊人之福後，就好易覺得自滿，加上冇乜空閒時間，所以愈來愈唔注重打扮，切記呢點係大忌！要鞏固好兩段關係，一定要持續加強自己嘅吸引力，令女人怕你畀人搶走而覺得要出盡方法討你歡心。另一方面你則要表現得好愛對方，不時對兩女表現出細心溫柔、關懷備至，除咗佢哋兩個之外，唔會再為其他人動心，咁先可以令佢哋甘心容忍落去。

雖然以上三點聽落好似可行性頗高，但若然你自問條件唔係正到好似碧咸咁，小弟都唔建議你咁做，皆因現代女性自主獨立，分分鐘人工學歷都高過你，又點會甘心就範？你估仲好似阿爺嗰代咁可以三妻四妾咁疏肝咩，分分鐘佢兩個因為日對夜對生出感情來，中途轉「基」飛起你呀！