環球偷食報告

翻開八卦雜誌，經常見到某某夜會俊男，某某又背妻偷食等新聞，真係睇到有啲悶。但提起偷食又點止娛圈中人？正所謂食得唔好嘥，咁啱得咁蹺，近期美國出咗個「環球偷食研究報告」，究竟邊個國家最多人偷食？點解要偷食？偷食對象又係邊類型？依家即刻為大家揭曉！

要講偷食，先同大家講吓「偷食」嘅定義，意思係指有固定伴侶嘅男女，不論已婚與否，背住伴侶同另一人發生性關係，就為之偷食！好似早前某政黨總幹事「偉哥」，背住老婆仔女去密室「指導」鳳姐，都算在內o架！

愈富庶愈易出軌

據資料顯示，美國有大學應用社會學系，近年做咗一個男女偷食調查，雖然報告冇提及亞洲，但研究結果非常詳盡兼抵死。調查分開男女進行，結果發現男女都愛偷食，而愈發達地區就愈要偷食，總結偷食男女心態係：「食得唔好嘥！」

大家可能覺得公認最浪漫嘅法國，必定係偷食之最，查實佢只得「亞軍」，攞冠軍嘅係英國先真，皆因調查指法國男女有性冇愛，雙方遲遲都唔肯拍拖結緍，所以唔構成偷食罪名，頂多只算濫交！相反英國人向來早婚，亦因為定力不足，結果超過四成伴侶經常拈花惹草，偷食過第一次後更會上癮！

緊隨其後有南非、美國及丹麥，南非自世界盃後經濟急速發展，有錢就身痕，加上男女思想開放，偷食可謂事在必行，但過癮在情侶都深知另一半會偷食，不過雙方絕不會提出分手，免得做罪人喎！

美國就因為四仔工業稱霸全球，男女可以借助四仔自娛解決，竟然少咗偷食，犀利！最後與世無爭嘅丹麥，因為生活無聊，飲大兩杯啤酒就好容易酒後亂性！

有人話偷食嘅主因應該係衰鹹濕，但根據報告指出，原來頭五大偷食原因都同鹹濕無關。

男性

a.有人送上門，食得唔好嘥

佔75%

b.要型要威佔68%

c.伴侶管得太緊佔65%

d.性生活刻板想尋求刺激

佔38%

e.被故意陷害佔17%

女性

a.向伴侶報復佔58%

b.偷食對象條件佳

佔43%

c.伴侶性無能佔32%

d.顯示女性魅力佔22%

e.畀人呃上床佔18%

總結：調查報告發現，男性偷食心態多為食得唔好嘥，而女性則多為報復伴侶，照咁講，一眾經常出外尋歡嘅男人，咪要小心畀人戴綠帽？

大家信「近水樓台」定信「搵食行遠啲」嘅道理？調查報告發現男人偷食係無分地域，只要無需付出代價就會產生食「慾」！相反女人想偷食前會衡量家庭、朋友、工作以及伴侶知道後反應，從而評估偷食代價。而城市男女偷食對象次序最多為：

男性

a.公司同事佔89%

b.社交網友佔68%

c.伴侶朋友佔60%

d.自己朋友佔50%

e.嫖妓佔12%

女性

a.自己朋友佔69%

b.伴侶朋友佔50%

c.舊情人佔40%

d.社交網友佔27%

e.公司同事佔10%

總結：事實證明男人對性的確係下半身主導一切，而女性就要盡在掌握至會出手，同需要安全感不無關係！