婚禮偷食
每當小弟出席朋友嘅婚禮，總會有多少傷感，事關見到佢哋佳偶天成，而自己則形單隻影，難免會有啲感慨。不過，早前出席朋友婚禮時，居然畀我識到個斯文女仔，我哋仲傾得相當投契添。雖然後來冇再發展落去，但已令我對日後出席婚禮充滿希望，唔再傷感。而早前美國一個約會網站就進行咗一項調查，主要問題係出席婚禮是否容易結識異性，網站訪問咗2,000名年齡介乎25至45歲嘅已婚男女，結果發現受訪男士當中，有32%試過於婚禮當中溝到女，甚至發展一夜情。至於女士方面，亦有11%曾經於婚禮中結識到出軌對象。專家表示，出席婚禮容易結識異性，係同氣氛以及環境有關，一來婚禮予人幸福美滿嘅感覺，讓人對愛情充滿憧憬，二來大家都會悉心打扮出席，魅力大增，自然容易溝仔溝女，或者被人溝啦！