激熱女郎 射水降溫

早前嘅福島核災，令日本電力供應不足，有指東京為慳電少開冷氣，結果喺連日37℃高溫下，造成8人死亡、4,000多人中暑。類似慘劇當然冇人想見到，而日本風俗界就諗到利用水槍射水，消暑同時治療內心創傷，不過喺災難嘅傷口上撒鹽會唔會唔係咁好呢？

東京要節能，連大企業都要慳，小企業又點會例外！有指坊間一眾夜遊場所已縮短營業時間，由以往下午開始直至深夜，改為開店前後各縮短兩小時，大家必定會覺得前後唔見四粒鐘會做少好多生意，但講你都唔信，日人團結互助嘅精神，竟然連嫖妓都守望相助，三唔識七組團去滾之餘，更遷就夜場時間，若然玩家唔介意畀人睇，更可以喺同一房內開波，真係要寫個服字畀你囉！

消暑一流

不過焗桑拿般尋歡其實都幾痛苦，難怪近兩個月，當地風俗界雜誌統計，各區生意額大跌三成，情況仲未止血！調查分析，天氣熱係其中一個原因，其次係負面新聞不絕於耳，玩家壓力大，自然冇心情去玩。

偏偏東京一間叫「伊甸園」嘅風俗場就成為夜場奇葩，場內囡囡未算標青，營業時亦冇冷氣開放，但原來店主一改以往玩法，趁住呢個慳電炎夏變裝為「消暑水房」，駐場囡囡更改名「激熱女郎」，同客人入房再唔係唱歌飲酒猜枚，而係玩水槍互射。店主話達到消暑效果嘅同時，又可釋放玩家壓力，一舉三得喎！

制服任揀

據店主網站留言話：「日本面對前所未有嘅危機，作為當中一分子，有責任團結起來，同時我想出『精神療傷系Gals』為各上班族服務。」

所謂精神療傷系Gals，只不過係駐場風俗孃，透過畀客人噴濕全身以紓緩對方精神壓力，最後當然唔少得執劑勁啦！場內更提供近48種制服任揀，例如OL服、水手裝、女教師、熟女花裙、競泳水着及比堅尼等等，客人入房前可自行挑選，揀好囡囡及衣着後，入到「水房」就正式開始服務。

自創玩法

整個服務過程不設空調，客人覺得悶熱，可靠囡囡及風俗店準備嘅水兜或水槍噴水上身消暑。據玩家留言表示，呢種玩法達到環保、色情及刺激於一身：「雖然天氣極熱，但冷水可為男女消暑降溫，而囡囡嘅制服，經過多次噴射，三點若隱若現，非常誘惑，最重要係水槍玩意充滿童年回憶，男女雙方於房內你閃我避，比起任何性愛前奏更刺激。」

玩家相當接受呢種療傷女郎服務，更開始自創玩法，例如將酒精灌入水槍內同囡囡鬥噴鬥飲，亦有玩家將化妝水（潤滑劑）置於水槍內，到前奏時噴射到囡囡身上替其按摩，總之各適其適，任君選擇，難怪推出之後咁受歡迎啦！