引導員軍事集訓變戲水

第26屆世界大學生運動會，好快就會喺深圳舉行，大會就喺今個月18日，於德慶盤龍峽森林度假區內，安排160位引導員進行地獄式訓練。據報道，呢160位引導員，全部都係嚟自各省市嘅大專學生，主辦單位話明會以軍事式訓練，令每個女孩子都達到劃一標準，聽落相當嚴格。

戲水玩樂

但到咗19日，就有報道話呢批負責開幕式同閉幕式嘅引導員，喺集訓營內以性感三點式泳衣亮相，仲喺水池上演戲水大戰。因為有過百囡囡以泳衣亮相，所以新聞亦廣泛流傳，點擊率屢創新高。

有網友打探後得知，呢次採訪安排有可能係嚟自贊助商嘅壓力，因為佢哋招待過百囡囡，無非想增加宣傳效果，但刊出嘅照片都係囡囡步操同正規綵排，點擊率同轉貼率甚少，有見及此，於是有人提議暫停集訓一日，畀全部囡囡喺泳池戲水玩樂。

由於活動由軍事訓練變為美人戲水，於是吸引傳媒廣泛報道，令新聞點擊率大增，贊助商就自然開心啦！不過要啲大專生着泳裝做宣傳，亦引起唔少網民圍插，真係有得必有失咯！