法國職場易溝女
由於小弟係一個工作狂，幾乎每日都返工，而且日日做足10粒鐘，因此好多朋友都話我，成日掛住返工，梗係溝唔到女啦！仲話我咁鍾意公司，不如同公司註冊結婚罷啦！
邊個話喺公司冇女溝o架？不知幾多愛侶都係結識於職場上，而且仲能夠終成眷屬添！好似法國咁，男女於職場上搵伴侶嘅比率仲相當高。根據巴黎一項職場愛情習慣調查，發現受訪嘅51%男性，以及48%女性表示唔介意於職場上溝女或溝仔。而31%嘅男女受訪者俱表示，喺職場上搵伴侶嘅好處係選擇夠多。還有，23%嘅受訪男性及28%嘅受訪女性表示，鍾意與同事發展有性行為嘅感情關係。另一方面，10%嘅受訪男性表示鍾意同客戶發展關係，受訪女性則有4%。換言之，法國女性比較趨向於職場內搵食，咁對於男同事嚟講的確係好消息，因為只要去到法國一個女性較多嘅地方工作，肯定有大把女主動兜搭。睇嚟我都要學吓法文，再考慮去法國搵食喇！