艷模大鬧孔子廟

人體彩繪絕對唔係新鮮事,內地嘅房地產展銷會,經常都會搵大批裸模嚟彩繪助興,但係個幾星期前,喺山西太原嘅孔子廟入面,竟然有人搵嚟三位彩繪模特兒到場,以半裸性感打扮示人,乜玩到去孔子廟咁大膽呀?

非禮勿視

據內地網站報道,當日黃昏時分,有三名性感古裝打扮嘅美女,全身畫滿牡丹同埋彩蝶圖案示人。佢哋喺太原文廟內嘅大成殿,即拜祭孔子嘅廟宇出現,全程搔首弄姿,展示人體彩繪藝術,吸引大批龍友到場,主辦單位更話今次係專登挑戰傳統文化嘅標準。

參與活動嘅攝影師對此大表支持,但亦有街坊反對,事關呢度經常有老師帶小朋友嚟參觀,教授道德教育,萬一撞正半裸囡囡迎面走過,唔通要即時教埋佢哋「非禮勿視」嘅道理?而網友就更加對呢次活動嚴厲批評,話今次事件明顯純為出位炒作,而矛頭更直指文廟嘅管理單位。因為孔子廟係當地嘅重要文化景點,但遊人人數會按月份而有起落,管理單位可能想喺淡季刺激吓人數,於是咪諗橋想搞旺一下囉!

達達