白領相睇大會

早幾日喺南海獅山鎮舉行咗一個相睇大會，吸引咗2,000人報名參加，全部都係喺附近寫字樓返工嘅白領精英。有人話白領精英收入高、時間好，點會搵唔到拖友呀？但原來廣州一帶嘅白領族，周不時都要加班，而且同香港一樣，斗零都冇得補，比做工友更慘，而且每日閒閒哋都要加班2至3個鐘或以上，搞到佢哋冇晒私人時間，唔好話拍拖，就連返屋企食飯嘅時間都冇，真係慘情。

父母代勞

有關方面注意到呢個問題，所以每年都會為呢班白領一族舉辦一個盛大嘅相睇大會，今年已經係第4屆。呢個名為「廣佛都巿精英情緣派對」，大會安排咗好多遊戲，等現場嘅參加者可以熱熱身，打開話題，方便進一步溝通。

而喺大會嘅姻緣壁上，貼滿好多男女嘅資料，如果啱你心水嘅，就可以即場同對方見見面，互相了解一下。當日就有幾百對男女進行速配，而最搞笑就係有好多阿爸阿媽，代自己嘅仔女嚟搵對象，但萬一仔女到時唔認帳，咁咪令人空歡喜一場？

喺活動中，有男生帶咗幾盒卡片準備滿場派，呢招漁翁撒網，相信應該都幾有效果，但有網友就話當日囡囡質素較差，唔係好揀得落手。其實去得相睇大會搵男仔，囡囡條件斷估都好極有限啦，大家唔係應該預咗嘅咩？