六指男情場浪子
年紀大嘅朋友，多數睇過《六指琴魔》嘅電視劇或電影，故事講一個高手，天生六指，彈出嘅琴音可以傷人於無形，冇睇過都唔緊要，有冇見過身邊嘅朋友有六隻手指呢？原來古時啲相書話佢哋會刑剋父親，一生不得榮華富貴，屬下賤之相。
其實據現今研究所得，六指嘅朋友，頭腦思考敏捷，而且天生愛表現自己，喺古時人仔細細說話多多，比長輩仲要多嘢講，自然唔受歡迎，分家產都會分少啲；喺外邊打工，又愛表現，無論有冇真材實料都易畀同輩排斥，喺當時真係想發達都難。
但今時今日，你愈肯表現自己，就愈有機會上位，所以真係世事無絕對。感情上顯然係一個兩性高手，夠主動，又有諗頭，追求異性往往得心應手。喺性事上，佢哋一樣多姿多采，經常會畀到對方驚喜，但要呢啲人定性，除非佢哋到咗80歲啦！