用智能手機難溝女
家陣智能手機已成為潮物，喺街上見到好多男男女女都拎住一部係咁篤。不過，早前美國一個電子產品銷售網站進行咗一項有趣嘅調查，發現35%嘅受訪女士認為帶狗散步嘅男士，比起成日拎住部智能手機嘅男士更有吸引力。另外，大部分男士誤以為拎住平板電腦周街用好有型，但原來只係佢哋一廂情願咁諗，皆因有超過半數嘅受訪女士認為呢類男士一啲都唔吸引，甚至覺得佢哋扮晒嘢！
此外，調查結果亦發現好多年薪超過20萬美元嘅男士，平日好少拎住部智能手機係咁篤，反而佢哋喜歡帶狗散步以及手執一本書，盡顯高尚氣派，難怪女士認為帶狗散步嘅男人係更有吸引力。最後，調查亦發現，戴藍芽耳筒嘅男士令女士嘅反感程度，比起身體有穿環或紋身更高。咦！我冇智能手機，又冇戴藍芽耳筒、穿環同紋身，咁咪好有吸引力？