貞操是最好的嫁妝

最近內地好多新娘子，婚後都投訴自己出嫁時係「裸婚」，即係嫁畀個冇樓、冇車、冇現鈔、乜都冇嘅新郎哥，但有男性網友就回應指，新娘出嫁唔係要有嫁妝咩？如果女家有錢辦嫁妝，又點會係裸婚？

網友咁做係希望將經濟問題推番去女家身上，於是近期網上就掀起一片女生嫁妝嘅熱烈討論。期間，有位內地資深藝人柏萬青，就喺一個電視節目上表示，年輕女性應自重自愛，其中一句：「貞操是女孩給婆家最貴重的陪嫁！」便引起廣泛討論。

道德危機

有唔少衞道之士，對於柏萬青呢句說話都深表贊同，更有人話女人結婚時要求多多，但連最基本嘅嫁妝─「貞操」都冇，又憑乜嘢要男方送車送樓嚟做聘禮？聽落又好似幾啱，不少網友都表示支持，但就惹來一眾「非處」網友嘅反擊。

佢哋話喺現今呢個年代，仲有啲咁封建嘅思想存在，簡直不合時宜，而且有部分人嘅矛頭更直指柏萬青，對佢作出人身攻擊。我諗連佢自己都估唔到，喺節目上講嘅一句說話，竟然會成為兩性討論嘅焦點。

不過亦有網友提出，撇除有關經濟上嘅問題，喺高舉自由開放嘅今日，年輕人係咪應該要好好反思自己嘅道德觀念呢？係咪一句過時、一句落伍，就可以喺性事上隨心所欲，肆意放縱？呢樣先係真真正正需要正視嘅問題！