No Fur齊齊撐！
每年世界各地都有人舉行反皮草行動，喺歐美，妹豬例牌玩裸體，至於亞洲當然冇咁激，着吓比堅尼遊街爭取支持已經好好反應！而上月於東京涉谷，一班貌似o靚模嘅囡囡則分批喺街頭冒住寒冷天氣，身穿性感比堅尼，高舉「No Fur」（反皮草）標語。
扮動物 吸引途人注意
是次反皮草行動，喺當地網站反應超激烈，外界爭相留言要求多啲搞類似活動，口痕友更要求搵AV女優或水着妹上陣，以收更大宣傳之效！活動成效暫時未知，但據講幾位妹豬嘅比堅尼都係親自設計，佢哋頭戴毛毛耳，Pat Pat位置裝咗條假尾巴，扮兔仔、狐狸，真係大風啲都吹得起，性感度爆燈。難怪有網友話反皮草尚未成功，卻已令男士睇到熱血沸騰！
話時話，早前銅鑼灣街頭都搞過類似反皮草行動，雖然一樣有妹豬「以身試法」，可惜話題性就認真麻麻，不如向日本囡囡取經，或者學外國名模咁裸體反皮草，到時必定更有Noise！