酒後亂性冇着數
雖然小弟一向好酒量，但係人生當中有一件憾事乃係因醉酒而發生，當時糊裏糊塗對朋友嘅女友毛手毛腳，幸而，女方受落，而朋友當時又睇唔到，不過依家諗番起呢件事，我都仲一額汗。
冇做安全措施
事實上，酒精催化之下真係會令人做出傻事，又容易酒後亂性，事後追悔不已。早前澳洲一個網站媒體就為酒後亂性進行問卷調查，總共有超過2,000人參與。當中，47%嘅女士以及44%嘅男士都後悔自己酒後亂性，更希望時光可以倒流，自己未曾同對方上過床；至於佢哋點解咁後悔，則未有透露。同時有超過一半嘅受訪者表示，佢哋平日非常注重安全性行為，但當中就有22%人士表示，因為酒後亂性而冇做足安全措施。飲醉酒之後唔知同邊個上床已經驚，連安全措施都唔做，仲唔悔不當初咩！