北京女藝術家裸體坐籠
藝術嘅嘢，見仁見智。最近內地網友對北京一位玩行為藝術嘅女子頗有微言，質疑佢只係賣弄色情。呢位叫海容天天嘅女藝術家，為咗表達自己對現今職業女性生存狀態嘅想法，製作咗個人形坐姿鐵籠，每日走入去裏面坐八個鐘，期間只會透過網絡同手機與人溝通。
做騷博出位
本來坐喺鐵籠都冇乜問題，但弊在佢每次都會剝清光，然後搵工人推住呢個鐵籠圍住北京798藝術區巡遊。其後佢更叫人將鐵籠以貨車運到巿區作巡迴演出，惹來當地媒體爭相追訪。海容天天自然將自己嘅理想同目的道出，但有網友就指摘佢存心利用肉體嚟爭取曝光，喺藝術園區內「展覽」本來都仲可以接受，但係去到鬧巿裸露身體，實在有傷風化，未免太過分，強烈要求有關方面要正視呢類色情藝術。其實翻查資料，海容天天於幾年前，已試過公開徵集男士陽具照片，宣稱用嚟作展覽，當時已被人認為佢利用色情藝術製造話題，今次又嚟一招裸體坐籠，唔知大家又點睇呢？