東莞倡產檢防梅毒嬰

最近有報章透露，東莞喺「兩會」期間，有組織向大會提出名為《關於降低胎傳梅毒發病率的建議》嘅議案，指出由2006年開始，每年東莞巿嘅出生人口中，竟有百多名嬰兒因母體感染而患上先天性梅毒。

所謂先天性梅毒，係指嬰兒喺母體內已經受到感染，如懷孕期間母親沒接受治療，病毒就有機會導致胎兒流產，而僥倖存活嘅嬰兒，於出生後，無論身體或者五官，亦會出現後遺症。

冇錢檢查

至於導致呢個年誕百名梅毒嬰嘅現象，有專家估計係一啲缺乏教育兼低收入嘅性工作者，喺進行性交易時，冇做足安全措施，當感染上性病後，亦冇錢治療，而不小心懷有身孕嘅囡囡，亦因為冇錢做產前檢查，於是一直到生產時才發現胎兒感染隱性梅毒，導致嬰兒出生後出現病變或身體殘缺等問題，加重醫療負擔。

有見及此，當地有組織就建議政府負責替所有孕婦作產前檢查，而費用則只需¥10，若驗出胎兒感染梅毒，則可為孕婦進行治療，費用亦只不過係¥100。

據了解，東莞早喺09年起就替當地有戶籍嘅孕婦做免費產前檢查，但現時出事嘅，大多數都係由外省來嘅低收入性工作者，所以唔少網友都支持全部檢查費用由政府負責，以彌補佢哋對掃黃不力嘅代價。