男伴愈有錢愈多高潮

有人話港女有三高：學歷高、人工高、對伴侶要求高，故對於外表平凡、人工唔高、身家唔厚嘅男士毫無興趣，我哋一班港男真係恨到咬牙切齒！因為，我哋好多港男都有三高，就係忍耐力高（唔係點頂得住港女嘅脾氣呀！）、心頭高（成日想中六合彩，一朝成為千萬富豪），仲有技術高（晚晚睇咁多日本AV，點都學到一招半式），單憑呢一點技術就肯定可以令女伴高潮迭起，享盡性福啦！咁都唔揀我哋，反而成日想釣金龜，係咪抵嬲先！

心理影響

不過，睇完英國一間大學一項研究報告之後，我諗男士們要改變想法，努力搵錢做富豪喇！呢項研究搵嚟1,534名有男友或老公嘅女士進行調查，結果發現121位女士每次交歡都有高潮；而408名女士表示時常有高潮；762位女士表示只係偶爾才有高潮；243位女士就話自己好少，甚至從來未有過高潮。研究同時發現次次都有高潮嘅121女士，佢哋嘅伴侶平均身家比其餘男士豐厚，即係話有錢男人能夠令女士更能達到高潮。主理研究嘅專家表示，每個女士心理上都潛在一套生育觀念：生BB，以及養育子女成為出色人士，所以佢哋搵伴侶嘅時候，就特別鍾意人工高、有地位同有錢嘅男人，因為呢類男士正是成功典範，生出嚟嘅BB自然有優良遺傳，而BB出世之後亦唔需要憂柴憂米，正因為呢個想法，令女士同有米老公或男友交歡嘅時候特別放，自然容易達到高潮啦！