大肚新娘成趨勢
以前「奉子成婚」，好易畀人笑到面黃，但時至今日，好多人都習以為常，據內地某大網站嘅最新調查結果，現時10對新人裏面，大約有4對係「奉子成婚」，情況十分普遍。
出現咁多大肚新娘，最主要係現今內地性態度開放，同居已經十分普遍，如果雙方感情冇乜嘢變化，佢哋會一直保持呢種關係，除非意外懷孕先會考慮結婚，等子女出生時享受婚生子女嘅保障，免卻麻煩。
未必幸福
是次調查中，有五成人覺得「奉子成婚」好普遍，亦有五成人認為「大肚新娘」會成為趨勢，此外亦有六成網友認為「大肚新娘」婚後未必會幸福，至於點解？網站冇解釋，但有專家就認為呢啲婚姻係出自意外，雙方可能並未真正準備好，所以難以保持。所以話男女兩性關係，真係可大可小，咪以為只係兩個人嘅事，一個唔小心搞出人命，到時心態唔識得調整適應，遲早出事，奉勸大家行事前都係諗清楚好啲，做足安全措施咪冇咁易中招囉！