愁到爆
呢幾日得哥返到公司，都見到坐喺佢隔籬嘅肥華個樣愁到爆，仲經常喺度唉聲嘆氣，於是走過去問佢：「你呢幾日愁成咁，究竟發生乜嘢事呀？知唔知你嘅負能量搞到我冇晒心機做嘢？」
肥華嘆咗口氣話：「係咩？我唔覺喎！我心煩，皆因屋企發生咗啲事。」
得哥就話：「發生乜嘢事？講出嚟，睇吓我幫唔幫到你。」
肥華答道：「官司，同人打官司。」
得哥奇問：「點解無端端打官司嘅？」
肥華又嘆咗口氣話：「講出嚟真係羞家，因為我老婆畀人搞……」
得哥愕然問：「咁大膽搞人哋老婆，呢個麻甩佬真係沙膽！咁唔使審都知呢場官司你贏硬啦，咁你又煩乜嘢呢？」
肥華就答：「煩就煩在我哋打輸咗，老婆仲畀人拉埋！」
得哥嬲爆喝道：「有冇搞錯呀？老婆畀人搞仲要畀警察拉，仲有天理嘅？」
肥華聞言就喊住口話：「弊就弊在我老婆事後收咗嗰個男人錢呢！」