醉到懵咗
坊間有云，男人有錢就會身痕，所以作為一間大企業老闆嘅肥浩亦一樣，每晚都會同班夥計出去花天酒地，一唔夜蒲硬係覺得周身唔自在。今晚肥浩又再蒲癮發作，等班夥計一收工，就拉隊去公司附近嘅夜總會左擁右抱，盡情放任自己。
不過，唔知點解今晚肥浩飲得特別性起，為咗威畀班小姐睇而表演吹喇叭，飲咗成支XO，就算係神仙都企唔穩啦！大家見肥浩醉到成堆爛泥咁款，夥計們知道今次佢都冇可能請客，因而大感掃興，不過佢哋都仁至義盡送肥浩返屋企。
返到屋企之後，肥浩老婆美怡好辛苦咁幫佢抹面換衫，再拖佢上床。當美怡瞓到半夜，手機突然響起，電話傳來肥浩把聲話：「老婆……我要……夜少少先返呀……有應酬……」聽完之後，美怡先發覺枕邊嘅肥浩不知去了哪裏，但係就見到浴室門打開兼着咗燈！入去一睇就見到肥浩，而肥浩見到佢之後，居然話：「你上床等我啦！我同老婆講緊電話……」