紅內衣 過年賣斷市
過年過節，中國人喜歡紅色，貪佢夠好意頭，除咗掛到全屋都係揮春，有人仲會着上身，而內地有間著名內衣公司，就喺過年前推出多款以紅色為主調嘅女性內衣，更取名做「盛世中國紅」，仲喺大商場搞咗個花生騷嚟做宣傳。
據講新產品推出後生意唔錯，有啲大城巿嘅商場，更賣到斷晒巿，因為呢款內衣設計新穎，只要識配搭，仲可以內衣外穿，喺大事宣傳下，掀起咗一片搶購紅色內衣嘅熱潮。
男士大飽眼福
據網上新聞話，喺大型內衣公司大事宣傳下，好多人都覺得要買套紅色內衣嚟應節，於是除咗大商場，全國好多小商販，都以紅色內衣做主題，據講春節前生意好到不得了。
有口痕網友話，其實邊關內衣公司宣傳事，只係啲女人太過迷信，認為紅色有助催旺運程，所以先會一窩蜂走去搶購紅色內衣。姑勿論係因為乜嘢原因，只要內衣公司認為宣傳有用而搞多啲內衣騷，益吓我哋大飽眼福就得喇！