大鄉里揼邪骨
鄉紳們見附近一塊空地久久都未有人收購，又唔想起村屋嚟賣，於是就諗吓可唔可以搞番個水療中心搵真銀。而鄉紳們聞說深圳一帶嘅按摩水療做得有聲有色，成為港人北上熱點，於是就組團北上觀摩一下。當佢哋去到深圳嘅時候，肥浩就同平叔講：「聽人話內地嘅骨場好多都有邪骨服務o架！難得我哋可以撇甩班老虎乸，不如去試玩吓啦！」其他鄉紳聽到即刻點頭，仲流晒口水添！不過，佢哋唔知邊間場有邪骨玩，於是就膽粗粗求其走入去一間骨場，肥浩率先問服務員：「請問呢間骨場有冇嗰啲嘢玩o架？」服務員見佢眼神有異，就知道佢想玩邪骨，於是就話：「我哋呢度好正經o架！只係會幫客人按摩上半身。」肥浩又問：「上半身嘅定義係咩呢？」服務員話：「咪皮帶對上囉！」班鄉紳聽到之後，個個即刻將皮帶鬆到落膝頭，然後兔仔跳咁入場！