離譜辣妹寺院影寫真

最近網上熱傳一輯相，話說有個性感車模，喺冰天雪地下，只着Bar-top同低腰迷你熱褲，喺名車旁搔首弄姿拍照。囡囡身材唔錯，個樣亦幾靚吓，但網友談論嘅竟然唔係靚女本身，而係佢身後嘅背景，因為佢哋嘅取景地點，竟然係一間和尚寺！

褻瀆神明

如果大家單睇美女嘅身材，都幾難留意得到取景地點，但其中有張攞全景嘅相片，就畀網民睇出有問題。因為囡囡身後嘅建築物，好古色古香，再仔細留意，就會睇到牌匾寫上「××寺」。

正義嘅網友得知後，當然發帖抨擊，話佢哋拍還拍，點解會去到佛門清淨地影性感寫真，簡直係褻瀆神明，仲侮辱埋出家人添！由於原帖只刊出照片，冇描述拍攝地點，所以冇乜人知道真實地點所在。

後來有網友查出，可能係位於成都嘅一間寺院，但亦有人話係河北嘅某大寺院，總之就各執一詞，但奇怪在議論多日，被人喺門口偷拍嘅寺院，竟然冇人出嚟回應，於是網友又推測話今次拍攝可能係得到寺方嘅批准，此話一出，又引起一眾正義網友嘅狠批。

由於近年唔少寺院都同旅遊業掛鈎，為咗吸引遊人嚟參觀，於是又搞選美、又搞花生騷等活動，大賣美女嘅身材，於是網友又將矛頭指向寺院高層，話佢哋離經叛道，如果拍攝單位唔快啲出嚟解畫，件事應該有排至收到科。