辣到喊
肥浩嘅阿爸因為要行船，所以幾年先返屋企一次，幸好阿媽對佢照顧有加，而隔籬屋嘅肥叔叔亦對佢哋兩母子相當關照，令肥浩嘅童年十分溫暖。及後，肥浩讀書成績佳，得到一筆獎學金去外國讀書。輾轉5年之後，肥浩畢業回來，由於阿媽返咗內地探親，於是由肥叔叔代去接機，肥叔叔見到多年不見嘅肥浩，覺得老懷安慰。當晚，兩人就去食麻辣火鍋，肥浩諗住先品嘗一下湯底，但係辣到眼淚直流，肥叔叔就問：「浩仔，咩事流眼淚呀？」肥浩死撐咁話：「冇嘢，我諗起阿媽之嘛！」跟住，肥叔叔就大啖品嘗湯底，點知辣到跳舞，仲感到喉嚨劇痛，要即刻去睇醫生。當肥叔叔等緊攞藥嘅時候，雙眼一路流淚，肥浩就問：「唔通你好似我咁諗起阿媽？」肥叔叔就話：「我真係諗起你阿媽！如果唔係當日同你阿媽生咗咁唔誠實嘅你，今日我就唔使辛苦成咁喇！」