半推半就

局長肥明上任前，雖然口口聲聲話自己絕對唔會做貪官，但係上台之後好快就貪到盆滿缽滿，成為市內數一數二嘅大貪官。今晚，肥明就應一大商家嘅邀請，參加一個大魚大肉嘅宴會。

大家把酒風花雪月嘅時候，大商家就偷偷哋將幾條金條塞到肥明手中，肥明當然知道當中嘅意思啦！不過，肥明知道近期有秘密調查員收集官員貪污嘅證據，於是就叫助手平仔過嚟，然後將幾條金條放入其底褲當中，再話：「你袋住啲金條，返我屋企畀夫人啦，醒目啲呀！」平仔隨後截的士飛返局長屋企。

夫人一開門，平仔就急急衝入去問：「屋企有冇其他人呀？」夫人就答：「冇呀！咩事呀？」平仔一邊除褲一邊話：「咁就最好不過喇！」夫人見到平仔除褲，就急急話：「你唔好亂嚟呀！」平仔就話：「我畀金條你呀！」夫人怒道：「畀金條我都唔得呀！」平仔繼續話：「係局長叫我嚟o架！」聽到平仔咁講，夫人一邊除衫就一邊怒罵：「衰佬！呢啲嘢自己唔嚟做，反而叫助手嚟，咁即係叫我送頂綠帽畀佢戴啫！」