激凸英雌黑貓
美國英雄漫畫嘅女角色，向來以靚樣好身材作為賣點，從神奇女俠到X-man中嘅暴風女神，個個心口都有對導彈。雖然身材正斗，但係西洋風格，未必啱日本動漫迷嘅胃口，故此近年就有人搵嚟日本模型師，幫呢班女英雌加入東瀛味道，重新包裝，好似今次介紹呢個黑貓（Black Cat）模型就係其中之一喇！
展露深溝
黑貓係《蜘蛛俠》漫畫中一個女角色，故事講述佢個老竇Cat係珠寶大盜，但被囚禁喺監獄，於是佢走去劫獄，期間巧遇蜘蛛俠，兩人互相產生好感，更發展出一段曖昧關係。
能夠令到蜘蛛俠心動，黑貓當然係外形吸引，一副激凸身材令人流晒口水。不過今勻落喺日本模型師手上，黑貓就從一個辣妹，變咗做美少女，有種野貓變家貓嘅感覺。另一方面，佢對車頭燈亦縮咗水，但仍然有睇頭，配合埋件黑色Deep V皮衫，展露出一條深溝，非常養眼，相信大家對呢個和味十足嘅黑貓大感收藏興趣。