廣州車展明星美女

早幾日,第8屆廣州國際汽車展覽會終於圓滿落幕,成為2010年內地最後一個大型車展,據新聞報道所知,車展嘅成績又創造咗幾個第一,但我哋比較關注佢哋嘅車模,據網友評分,今屆廣州車展嘅車模,係全年內地咁多車展中最多靚女出席嘅一個。

大家不妨翻查相關網頁,單係車模嘅照片,更係內地咁多車展之最。據內地某知名網站公布,單係佢哋自己,就喺會場拍咗將近10,658張車模照片,加埋其他媒體同龍友作品,數目更係天文數字。有人會問,點解要影咁多相呢?好簡單,咪就係靚女太多囉!

激似女星

有熱心網友就發帖,總結咗佢哋有五大優點:第一,質素平均,唔會有豬扒出現;第二,專業有禮,個個都訓練有素,無論幾攰都笑面迎人,唔會畀人拍到啲冏樣照片;第三,就係化妝出色,明顯係有專人負責,唔似一啲展覽會嘅囡囡咁,化到好似紙紮公仔咁嚇人;第四,制服亮眼,全部都好似度身訂造一樣,唔似有啲車模着到衣不稱身,幾靚都扣晒分;最後,係眾星匯聚。

今屆車展啲車模,除咗靚女夠多之外,啲化妝師仲將一啲激似明星嘅囡囡,刻意化埋同一個妝,令佢哋望落更有星味,搞到現場星光熠熠,直情好似大明星親身駕臨一樣!

有網友就搵咗10位車模,話佢哋同女星十分相似,當中有山寨版湯唯、大S、林志玲等美人。雖然似唔似真係見仁見智,但今屆車展嘅靚女車模,真係個個都唔會令你失望,大家不妨上網搵搵,睇吓有冇漏網嘅山寨版巨星!

去邊度食聖誕大餐好?
即上on.cc東方互動《享樂聖誕2010》專輯,為您一站式搜羅各類聖誕消費情報!

達達