裸跑贏門票
香港每年都有好多演唱會舉行，但唔少都係奀星兼流到震嘅歌手做嘅，真係請都唔會睇！唔似得超級天后王菲復出開個唱，一眾餓咗多年嘅樂迷都為之瘋狂，門票一開賣就售清，真係一票難求！如果想睇，就真係要諗諗計，或者花多少少錢向持票人士收購喇！
大家為咗撲飛，除咗會大灑金錢外，有人亦會為此犧牲色相。喺丹麥，就有一班人為咗得到一個大型音樂節嘅門票，而不惜剝光豬裸跑嘞！
一票難求
每年6月最後一個星期日，都係丹麥城市Roskilde舉辦嘅Roskilde音樂節開幕之期，呢個活動堪稱世界5個最大型嘅音樂節之一！近呢幾年，世界頂尖歌手及樂隊雲集嘅Roskilde音樂節，都吸引到超過8萬名樂迷參與呢個為期四日嘅露天音樂盛事！
由於音樂節於郊區舉行，所以樂迷好多都要在場外紮營度過呢四日，而大會喺每年音樂節嘅最後一日，都會舉行一場裸跑比賽，勝出嘅朋友就可以得到下一年Roskilde音樂節嘅門票一張，合共有20個名額！
為咗爭奪呢張有錢難求嘅門票，瘋狂樂迷個個都不畏犧牲，齊齊剝光豬參與賽事，個人認為，呢個裸跑比賽應該好睇過歌手演出囉！